Александр Винокуров: Команда жаңа келбет алып келеді
Жыл соңында қорытынды шығару дәстүрге айналған. Astana Qazaqstan Team үшін өткен жылды қалай бағалайсыз?
«Өткен маусымда кездескен және бірнеше рет айтқан көптеген қиындықтар мен мәселелерді былай қойғанда, мен 2023 жылды бүкіл Астана жобасының серпінді даму жылы деп сипаттар едім. Атап айтқанда біздің Әлемдік Турдың командасы Astana Qazaqstan Team. Қазақстанның негізгі велокомандасы жаңа келбет алып келеді. Көз алдымызда өзгеріп, дамып, алға жылжуда. Ал егер сырттай бұл өзгерістер әлі байқалмаса, онда команданың іші көп өзгерді, түрленді. Басымдықтар өзгерді, мақсаттар мен негізгі міндеттер қайта ойластырылды. Кәсіби велоспорттағы белгілі, классикалық нәрселерге көзқарас өзгерді. Жалпы жоба туралы айтар болсақ, нығайып, аяғын нық басып, құрлықтық деңгейде берік орныққан жастар құрамасының дамуы туралы айту керек. Алғашқы жеңістер, тамаша нәтижелер болды. Шабандоздар да, қызметкерлер де тәжірибе жинақтады. Бұл олардың болашақта өсіп-өркендеуіне көмектеседі».
Astana Qazaqstan Team құрамындағы өзгерістердің себебі неде?
«Бұл жерде бірнеше себеп бар. Біріншіден, велоспорт бір орында тұрмайды. Спорт технологиялық жағынан да, функционалдық жағынан да жаттығу тәсілі мен тамақтануы жағынан дамып келеді. Біз озық тенденцияларды ұстануымыз керек. Жаңашылдықты жіберіп алмауға тырысуымыз керек. Сонымен қатар команданың өмір сүруін жалғастырып қана қоймай, жарқын болашаққа үміт артуы үшін өзімізді де дамытуға тырысуымыз керек. Екіншіден, қаржылық бөлім. Басқа спорт түрлері сияқты велоспортта да қаржылық бәсеке жүріп жатыр. Қомақты бюджеттер жеңіске кепілдік бермесе де, елеулі артықшылық береді. Егер бюджетті ұлғайту мүмкіндігі болмаса, басқа мүмкіндіктерді іздеу керек – іріктеуге, құраманы жасақтауға, мақсаттарды өзгертуге, оқытудың жаңа тәсілдерін іздеуге және т.б. Бұл жағдайда командада бастысы өзгеріс емес, оның эволюциясы. Мен Astana Qazaqstan Team 2023 жылы дұрыс бағытта болды деп айтар едім. Бұл бізді 2024 жылғы маусымда елеулі табыстарға жетелейді».
Astana Qazaqstan Team бұрынғы позицияларына 2024 жылы қайта оралады деп күтуге бола ма?
«Мен былай деп жауап берер едім: біз табысқа сене аламыз, бірақ бұл өткен жылдардағы «Астанадан» өзгеше болады. Бізде тамаша, біркелкі құрам бар. Жаппай спринттің, бір күндік және классикалық жарыстардың жаңа саласында тамаша жұмыс жасадық. Сонда біз өзіміздің мықты екенімізді дәлелдеуіміз керек. Әрине, «Астана» әрқашан Гранд Турда алдына жоғары мақсаттар қоятын команда ретінде танымал болған. Бірақ енді мұны тоса тұру керек. Командада суперкөпкүндіктерде өздерін көрсете алатын шабандоздар жетерлік. Бізде бір үміт бар. Бірақ әзірге жеңіс тұғыры үшін күресу өте қиын. Дегенмен бәрі өзгеруде. Тынбай еңбек ету арқылы біз осы жоғалған позицияларды қайтара аламыз. Ал әзірше біз өткен жылдардағы «Астана» жобасымен тығыз байланысты болған жеңістің дәмін толық қалпына келтіру үшін спринтке, классикаға және шағын көпкүндік жарыстарға назар аударамыз».
Келер жылы Олимпиада…
«Иә, расымен де 2024 жылы Парижде Олимпиада ойындары өтеді. Ал командамыз үшін бұл өте маңызды. Қазақстандық спортшылар елімізді лайықты таныту үшін барынша байыпты дайындалатын басты жарыс. Біздің бүкіл жобамыз үшін Олимпиада – бұл «сағаттарды тексеру», яғни белгілі бір нәтижелерді қорытындылайтын сәт. Шабандоздарымыздың Олимпиада ойындарында жетістікке жетуге мүмкіндігі бар және біз соған ұмтыламыз!»
Бас серіктес «Самұрық-Қазына» және «SportQory» спортты қолдау қорының қолдауымен!
Photo credit: @SprintCycling